Saban Bajramovic arakhadjilas ando foro Nis ande Serbia ando bersh 1936. Vov avelas khatar jekh traditionalno romani familja thaj anda kodo chi pirdas vov but ande skola, ke atunci chi rodenas e rom kade edukatcia sar adjes. Vov muklas e skola pala 4 klassi. Saban Bajramovic Sitcilas peski muzikaki edukatcia pe droma thaj khatar e kaver rom so bashavenas.

Kana o Saban sas 19 bershengo kamlas pe vov ande jekh tjej. Anda kodo ke vov la kade kamlas nashlas vov khatar e ketania thaj kerdjilas desertoro. Kana vov sas astarto khatar e ketania las vov 3 bersh temlita thaj beshlas ande Goli Otok.

Trajo ande temlica sas pharo numa e Sabanos sas jekh talento, vov kelelas mishto fotboll, vov sas jekh lashio kiperi thaj kodo kerdas ke vov birisardas te traji ande temlicia. Kote dine les vi jekh malimasko anav - "Black Panther"

Pala jekh vrama ande temlicia, shutas pe vov zorasa ande e temliciaki orkestra thaj kote cirdelas vov maj but Jazz, leske sas maj drago te bashavel e muzika so Louis Armstrong, Sinatra thaj John Coltrane cirdenas. Pala e temlicia boldas pe vov palpale ande Nis thaj las jekh buci sar muzicari thaj djilabatori pe jekh cafeteria.

Ando bersh 1964 araklas les jekh producento khaj bushiol Jure Robeznik, leske sas kade drago e muzika so o Saban Bajramovic djilabelas ke boldas lesa vi jekh plascinka. Pala kadi plascinka kerdas vov opral 650 muzikake komposizatci.

Saban Bajramovic djilabelas romani muzika so sikavlas o romano trajo thaj e romani dukh. Pasha kado djilabelas vov pa e romani losh, romano kamipe thaj kado sas savorenge drago.

Jekh anda leske maj pindjarde djila sas Geljan dade, khaj vov kamlas te sikavel e dukh pala e manush so mukhenas e Jugoslavia thaj tradenas ande amerika. Ande 1970 bersh kerdjiol vov zurales pindjardo ande intrego Jugoslavia thaj vi djilabelas djila romanes thaj Jugoslavitska djila.

Ande kodol bersh kerdas vov vi jekh gruppa, e gruppa bushiolas Black Mamba, kadala grupasa tradelas vov krujal e ljuma thaj djilabelas ande sa e thema. Vov kerdas vi jekh koncerto a Indira Ghandiake. Kana o maripe areslas ande Jugoslavia, inkrelas pe o Saban maj but pe resteranura thaj kafeteri thaj djilabelas. Vov sas pindjardo ke leske sas drago te hal but, te piel but thaj te trajij sar jekh chacho raj.

Pala o maripe las vov pale te djilabel officialne thaj kerlas pale koncertura peska gruppasa Black Mamba. Vov boldas vi 2 filmura khaj vov sas muziciari ande filmura. Ande e 2000 djalas leske ekcera maj phares, ke vov sas maj nasvalo thaj khino thaj nas but zor ande leste, numa vi kade cirdelas vov maj dur thaj vi djilabelas.

Vov djilabelas maj but kusa o Goran Bregovic, Mostar Sevda Reunion, Liljana Butler thaj po agor a grupasa Cubismo. Ando bersh 2008 sas vov po baro jazz festivalo ande pesko foro Nis, kote las les ando hjilo thaj vov mulas 8 juni 2008.

Pe lesko prahope avile but bare artistura thaj but kaver manush, mashkar sa e manush so kote sas, avilasas vi o Presidento Boris Tadic te najisi e Sabanoske anda leski muzika. Pala lesko meripe avilas vi o fakto ke o Saban Bajramovic sas chorro peske palune bersh. Vov phabardasas sa anda peske pe pesko trajo.

Avilas vi o fakto ke e Serbia dasas les 10 000 euro te avel vov peste te na trajij vov kede chorres. Saban Bajramovic kerdas opral 650 djila, 20 albumura thaj 50 singlura muklas.

Vov si pindjardo pa intrego ljuma, Jekh zurales baro thaj pindjardo artista ande intrego balkan, vov si jekh anda e maj bare romane djilabatora pa intrego ljuma, jekh legenda...

Jekh legenda e anvesa .... Saban Bajramovic -– The king of Gipsy music!

(Forrás: Radio Romano: http://sverigesradio.se/sida/default.aspx?programid=2122)