Sas kaj nas, sas jekh baro raj. Kodo baro raj kethane kidas le bute chorre romen. Kodi kamlas lenca, phuvaki butyi keravel lenca. Vi kernas le rom butyi. Jekhar so del o Del, o raj kethane akhardas le rajen.
De mure manusha, aven, sikavav tumenge jekh bari rama, sar keren mure rom e gazhikane butyi!
Vi avri geline pe phuv, kay kernas le rom butyi.
- Devlesa akarhav tumen romale!
- O drágo Del andas tumen rajale! So kamen te zhanen, kay rode amen opre?
- Kamav te sikavav kadale rajenge, hoy sar zhanen te keren butyi tume!
Pe kadi phenel o mayphuro rom le rajeske:
- Raja tyo baripe! Mangos tut pe varisoste, t avesas kasavo lasho te keres le mange!
- Phen manusha! Te zhanav te kerav la, vi kerav la tuke!
- Dikh muro raj, sar xan kotka le gulumbura!
- Na phen kodi phure roma, ke naj kodol gulumbura!
- Haj so si kodol bare raja?
- So si, haj dikhes ke choki!
- Bare raja, ker aba kodi, t aven gulumbura!
- Ejnye phure roma, hay chi som me Del, te kerav anda lende kodi so me kamav!
- De dikhes la bare raja, te zhanes te keres anda lende gulumbon, atunchi anda dromare manushende sar shaj keres phuvake butyarnyike manushen!
- Platniko, chachi vorba phendan! – phenel o baro raj. Pala kodi le rom geline-tar.
|